中國第一大電腦品牌聯想，在中國已連續六年銷量冠軍，拋離IBM、Compaq等競爭對手幾條街，當中原因除地頭蟲角色外，其經營概念及服務，均比香港不少公司優勝。去年十月聯想正式在港成立分公司，兼且引入三款桌面電腦，到下星期更會宣布推出P4Notebook系列，其他如數碼相機、PDA等陸續有來，正式向全港品牌宣戰。
記者、攝影：徐影龍
聯想桌面電腦全國年銷四百多萬部，連續六年成為中國第一，當中超過六成係透過旗下1+1專門店賣出，都算厲害。1+1的意思便是希望每一個中國人，都擁有一部電腦，即係以十億部電腦為目標，宗旨都幾宏大。1+1專門店形象鮮明，全部分店不論售賣機種、店員服裝、舖位擺設等都一模一樣，重緊貼潮流搵嚟人氣急升嘅台灣組合F4協助宣傳，不但全國400間專門店都擺放住F4大海報，連電腦Wallpaper同ScreenSaver都以F4做主角，令到兩者都大收宣傳之效。
目前登陸香港型號暫時只有天麒、天麟同未來先鋒三個系列，由去年十月到今，已賣出差不多一萬套，雖不及國內成績，但亦已算不錯。到下周聯想便正式推出旗下另一王牌Notebook系列，之後各式數碼產品陸續有來，相信亦以低價錢、高質素為賣點，正式挑戰全港廠牌。
除一系列桌面電腦外，聯想其他核心產品重包括Notebook、數碼相機、打印機、PDA、PocketPC同USB記憶卡等，所有產品合稱為家庭數碼港，其概念係希望用家由影相、編輯儲存到Send出去畀朋友，都係使用聯想產品，情形同SONY嘅MSNetwork有點類似，相信未來會有更多種類嘅數碼產品推出。
聯想1+1專門店不但售賣電腦產品，而且重會舉辦電腦培訓班，唔怕買咗電腦後唔識用，另外重會定時舉行電腦冬令營、夏令營等活動，此舉令聯想電腦形象提升不少，香港商家真的要參考一下其體貼用家之細心。
筆者受邀到聯想於惠陽嘅PC生產線及研發中心參觀，聯想於中國主要有三大據點，除惠陽外，其他便是北京同上海。惠陽生產線以桌面電腦、底板及各式線路板為主，著名的QDI底板便是由聯想所生產。以桌面電腦為主嘅「PC整機廠」，設有四條流水生產線，一條Cell生產線(即以應付小量定單為主)，廠內裝嵌員工各自負責唔同嘅裝機程序，不到一會兒便完成，一部電腦便誕生，最後運去測試、品質檢查及包裝，便可正式推出市場。
聯想官方網址：