容祖兒前晚在柴灣拍攝新歌《Madaboutyou》的MV，她一改以往活潑少女形象，以長髮、大耳環及一身鮮紅色tubetop長裙示人，盡顯女人味。可惜已穿上收腹內褲的祖兒，腹部仍見微隆，看來她確要認真減肥。
容祖兒前晚在柴灣為新歌《Madaboutyou》拍攝MＶ，除請來三位猛男及一位性感女舞蹈員作伴舞外，祖兒亦有大突破，她一改以往活潑少女形象，為增添女人味，特地穿上一條鮮紅色tubetop貼身長裙，左耳戴上一磅重的大耳環，更花三小時駁了長髮。
祖兒的形象設計師表示，由於祖兒怕着貼身裙會凸現其肚腩，於是特地穿了一條收腹內褲打底，可惜仍見腹部微隆，以致拍照時要刻意作深呼吸來縮肚。加上左耳的大耳環相當重，祖兒不時要以手托着耳環，頭部又不可有大動作，十分不自然。
祖兒說：「呢條裙係好性感，性感過之前唱片封面嘅吊帶背心。我着呢啲衫之前，我媽咪都會試着一次先，睇吓需要襯乜嘢內膽打底，同埋確保安全，唔會走光先畀我着。我媽咪身形同我差唔多，矮我少少囉，佢好索㗎。」
提到要積極減肥，祖兒說：「其實肥有肥好睇，我以前重好介懷，覺得瘦先有型，𠵱家唔想再食藥，只會勤力啲做運動，我嗰排就係過份減肥，連湯水都唔飲，搞到聲都沙。肥又唔係錯，聲沙先係天大嘅錯，雖然我肥咗少少，但把聲靚就得啦。」
祖兒在MＶ中要配合歌曲意境，與舞蹈員跳性感辣身舞，對此她說：「我要做少少戲，做得性感啲嚟表達首歌，不過絕對唔係色情，我會大膽啲跳。」
採訪、攝影：駱華齡