噚日嘅NBA西岸決賽首戰，帝王為咗喺賽前向湖人施下馬威，專登請咗「健力士世界紀錄大全」嘅代表，嚟幫佢哋量度主場嘅聲浪。當時全場爆滿嘅近二萬個擁躉齊聲狂叫：「打冧湖人！打冧湖人！」（BeatL.A.!BeatL.A.!），加埋不斷咁勁放煙花，搞到現場嘅聲浪重勁過啲搖滾音樂會，破晒健力士世界紀錄，連兩隊嘅球員都頂唔順揞住晒耳仔，以免被震聾。
點知湖人班球員個個身經百戰，完全冇俾帝王嘅「噪音戰略」嚇窒，反而激㷫晒佢哋嘅鬥志，一開波就㩒住帝王狂攻，喺第一節就入咗破紀錄嘅三十六分，搞到班帝王擁躉個個目瞪口呆，鴉雀無聲，全場一片死靜。
湖人前鋒霍斯賽後爆咗一句最精警：「喺短短五分鐘內，佢哋由破世界最嘈嘅紀錄，變成破世界最靜嘅紀錄。」計我求大俠話，帝王打心理戰都唔識揀對手，喺湖人呢啲遇強愈強嘅班霸面前班門弄斧，最後只有自食其果！
聽講話威爾斯足總向曉士提供周薪三千鎊嘅合約，邀請佢由兼職轉做全職領隊。我求大俠聽到後，真係覺得好驚訝，事關曉士𠵱家喺布力般份球員人工雖然唔高，但都有成萬五鎊周薪。之不過，可以做國家隊領隊係一份榮譽，根本唔可以用錢嚟衡量，所以就算賺少，相信曉士都唔會介意。
世界盃雖然未正式開波，但阿根廷經已輸咗第一場。話說佢哋日前進行練習，但入場睇嘅球迷每人就要畀三百幾蚊港紙。點知班日本球迷睇完之後唔收貨，話班阿根廷球員練得「求其」，重要堆喺一邊練，搞到佢哋睇得唔清唔楚。阿根廷想贏番班日本球迷嘅支持，睇嚟下次練習時真係要認真啲。
我求大俠收到料，原來姚明早喺三年前已經有機會打NBA，但係當時中國政府規定，到海外搵食嘅運動員每年要將三成三嘅薪金「回饋」國家，當時姚明身邊嘅謀臣都叫佢等條件再好啲先走人，點知政府最近將每年徵收嘅「家用」增加至五成，搞到姚明𠵱家後悔莫及。