現年三十九歲的章小蕙，面對一大堆債項，仍舊自得其樂，全憑有堅毅的意志。談起男友陳曜旻，她表示二人仍是好友，並自言欠債二億五，根本沒有追求者，遑論另結新歡。
跟男友陳曜旻（Edmund）經歷幾許風雨，章小蕙對這段七年感情，浪漫感覺似煙消雲散。
章小蕙說：「經歷過十年婚姻，同Edmund又拍咗七年拖，愛情當中嘅苦與樂、緣起緣滅、天時地利人和配合同環境因素，都令我覺得有好透支嘅感覺，不過我仍會好好珍惜呢段感情。」
對於愛情，章小蕙到今天仍然充滿憧憬，她說：「早排有套戲叫《嫁個有錢人》，有個朋友同我開玩笑咁講，叫我應該去睇睇呢套戲，但係觸動我心，依然係冇滲入利害元素、金錢嘅純真愛情，只有愛情，就算俾巨浪翻倒，都依然覺得呢個世界係美好。」
到了這個年頭，章小蕙仍會為愛情不惜一切，包括與有婦之夫相戀嗎？她說：「愛情嚟到時，莫講話有婦之夫，即使做人八、九、十奶都心甘命抵。」這個三十九歲的女人，仍然愛得義無反顧。
對於昨日有報章報道指章小蕙與陳曜旻分手，另結新歡一事，章小蕙昨日下午三時返回中環時裝店時回應，她指着手上的某報說：「我想澄清吓，我哋嗰晚係有六個朋友出嚟食飯，之後就去飲嘢，嗰位男士嘅女友都喺度嘅，𠵱家搞到冇人肯再出嚟同我玩，我重要同呢兩位朋友道歉呀！」
章小蕙續說：「重有，我想講嗰晚Edmund都喺度嘅，佢係KeeClub嘅會員，並唔係好似報道話佢不得其門而入，重話佢嚟睇住我，要求復合，統統冇咁嘅事。」
問章小蕙現在與Edmund是甚麼關係？她說：「佢永遠係我嘅好朋友，我唔想同你哋講咁多我朋友嘅嘢，始終佢哋唔係圈中人，拉埋佢哋落水好唔公平。」
再問她是否真的與Edmund分手？她則反問說：「你哋分手嘅定義係點嘅先？總之我哋一樣有行街，睇戲同食飯啦。」
再問章小蕙不清楚講明與Edmund的關係，不怕嚇怕追求者嗎？她說：「我頂住咁大個招牌，重有人追？二億五呀！」
那Edmund有沒有向她求過婚？她再一次說：「我有個二億五招牌呀！」記者問假如Edmund不介意呢？她即說：「但係我介意呢。」