齊出席餐廳開幕又好避忌<br>馮仁昭四圍超:安雅男伴曾與Rosemary激吻

齊出席餐廳開幕又好避忌
馮仁昭四圍超:安雅男伴曾與Rosemary激吻

新鴻基主席郭炳湘夫人李天穎喺尖東帝苑酒店開咗間日本餐廳叫「稻菊」,前晚搞咗個開幕酒會,到賀嘅嘉賓層面廣泛,既有賭王何鴻燊同四姨太梁安琪呢啲富貴一族,又有一堆性感女星好似安雅同康華咁。

康華唔識郭太
安雅前晚同一位俊男結伴出現,呢位靚仔叫Stephen,年前俾人影到佢同名模Rosemary激吻,前晚佢同安雅見記者影相都好避忌。另外有份出席酒會嘅康華,佢話識得呢間餐廳嘅老細,但問佢識嗰個係咪郭太李天穎,佢就話:「邊個郭太呀?我識嗰個叫阿Ken咋。」
而前晚賭王何鴻燊同四姨太梁安琪到場冇耐,賭王千金何超瓊都嚟埋。問賭王佢個女何超儀主演嘅《太太》入圍康城影展,佢開唔開心,賭王即刻舉起兩隻手指示意話好,但重未開口,四姨太已經好嚴肅咁話:「喂,重唔上車。」賭王就好聽老婆話,乖乖上車。

章子怡肚兜裝最正
章子怡日前喺新加坡出席一個化妝品活動,被當地髮型師顏天發稱讚佢嘅肩膊最靚,最適合着肚兜裝。章子怡以普通話回應:「我的身材小巧,無法把旗袍的感覺穿出來,可能穿肚兜裝比較適合。」章子怡重話,平時喜歡作運動服打扮,貪夠方便。

WaxFans送衫即着
月底喺香港推出新唱片嘅韓國女歌手Wax,噚日喺紅磡海逸酒店舉行歌迷聚會,其間fans送咗一件超短嘅金色旗袍畀Wax,佢重即刻着畀大家睇。Wax話欣賞王菲、謝霆鋒、容祖兒同鄭伊健,而且佢覺得容祖兒改佢首《為你補妝》為《小天使》,唱得好溫柔。

何韻詩寧領養唔生仔
何韻詩噚日去灣仔伊館,為「保良局誼親日」做表演嘉賓時,話計劃助養小朋友,重誇口話就算結咗婚都唔會考慮生仔,寧願領養。阿詩話除咗怕生仔痛之外,係驚自己冇對象,莫非佢唔記得有個緋聞男友劉浩龍?

Shine搞喊歌迷
二人組合Shine噚日喺九龍城廣場出席簽名會,吸引咗約八百個途人圍觀。由於歌迷人數超出大會預算,所以由原本簽名名額三百人增至五百人,有啲歌迷更因為見到偶像而喊起上嚟。Shine話知道歌迷由前日下晝已經開始喺廣場等,因此感到好心痛。

克勤望新碟加碼宣傳
李克勤噚日喺香港仔何鴻燊體育中心拍攝新歌《VICTORY》MV時,又撲球又撻地,佢話:「我咁辛苦,希望唱片公司都識做,今張碟宣傳費加碼,落多兩個廣告,加多兩個dancer,當回饋歌迷都好呀。我最近幫公司賺唔少啦。」

林峯撐朋友蒲蘭桂坊
林峯前晚同幾位男性朋友蒲中環蘭桂坊,佢見到記者影相,即刻話:「我有朋友最近喺蘭桂坊開咗間酒吧,趁得閒咪約埋幾個朋友落嚟捧場。」其實前晚蘭桂坊都好熱鬧,好似黃子華舊愛劉婉君都有同未婚夫Bosco一齊蒲吧。