期指成功企穩萬二高位，回想上周市況，只見美資大行一到11600便力吸，到11900左右就整個程式沽盤嚇人，等到本地炒友以為萬二沽期指係免費午餐，累積番咁上下期指淡倉，呢班大鱷就掃上，挾到你雞毛鴨血，認真高招。
美國經濟有番多少睇頭，部份海外資金會回流。亞洲方面，台韓升了咁多，係時候休息吓。香港相對升得少，加上有中國概念支持，貨幣同美元掛鈎，分分鐘不跌反升。大藍籌中，和黃（013）最見落後，基金喜歡和黃港口業務，但對其電訊業務就有所保留。不過，這些不良因素已在股價反映，所以和黃現水平下跌風險有限。當然，若要挑戰80元關口，還需有催化劑。
筆者覺得近期發輪商沽了咁多和黃輪，挾倉誘因頗大，正是一種催化劑，和黃輪值得一博。其中9050行使價70.77元、9088行使價76.125元、9003行使價78.225元，呢3隻輪嘅行使價與正股現價相當接近，正股若然再上，發行商恐怕追正股追到暈。 鍾斯