章小蕙作為一個既要當家，又要創業的女人，難免覺得累。她說每天只睡四個小時，一切應酬和娛樂，都是每晚待一對兒女入睡後才進行，然後每天清早七時起床為他們上學打點一切。身心雖累，但能為一對子女所做到的，就是一個單親媽咪的補償。
章小蕙說：「香港小孩，有父母送到佢哋去學校門口係一件好奢侈嘅事，因為十個有九個都係由菲傭接送返學。如果可以令佢哋開心，我休息少啲又有乜所謂。好攰時候我都曾經諗過，若果冇仔女，我根本唔會鍾意返屋企，工作完之後就去玩，玩完又返工，盡情享受生活。不過我根本冇得選擇，已為人母係一個事實。」
有後悔嗎？章小蕙說：「只係當年讀完學士就選擇結婚，失去咗畢業生踏入社會發圍、衝刺嘅階段。雖然今年我三十九歲，但𠵱家先至係我人生衝刺開始，重拾呢個階段，擁有呢種二十幾歲嘅情懷都唔錯。」
一個女人的靚，理應不會有太多階段。十八廿二的花樣年華，到三十五歲前的韻味，應該是女人最燦爛時候。章小蕙的美，她自己分了四個階段：「我有幾個階段嘅靚，一係啱啱嫁阿B嗰時嗰種少女情懷，二係之後我喺台灣出唱片，三係我同Edmund啱啱一齊時，當時我成個轉咗變得好有女人味，第四係𠵱家呢個階段，從經歷發自內心嘅自信。」
採訪：盧雪琪、顏英儀
攝影：仇志德
髮型：Boffy（ChinG）
化妝：KamenLeung（TripleEdge）
場地提供：ChinG