今屆世界盃決賽周熱門之一的葡萄牙，噚日中午乘專機到澳門，展開佢哋喺澳門長達十三日的集訓，唔知係咪葡國大軍貴人招風雨，當職球員步出機門嗰陣，橫風橫雨，但班球員見澳門體育總局高層列隊迎接，依然好好笑容，認真有禮。
葡萄牙大軍步出機時搵嚟搵去都好似爭緊個踢AC米蘭的中場指揮官雷哥斯達，原來佢大哥押尾慢條斯理咁慢慢行出嚟；而呢位星級名將返到佢駐紮嘅威斯汀度假酒店，落去食飯時，即刻俾守候數十名球迷包圍，佢亦好客氣，差不多來者不拒，簽晒名至開飯。
澳門體育總局對今次葡萄牙到澳門集訓同二十五號場「中葡大戰」非常緊張，噚日晏晝五點幾重舉行拜神儀式，希望賽事順利舉行；而大會為咗唔想有任何亂子，就特別加強葡萄牙大軍嘅保安，先係出入有警車開路，酒店又有貼身保安員傍住，重有唔少便衣司警在場，幫班球星開路。