從一個地產代理做到今日上市公司董事，郭昶只用了二十年時間。
從第一個進修課程至今年九月即將再報讀的課程，他所追求的都是與工作有關的知識，今天，他可以自豪地說自己已通曉整盤地產生意，而他的師傅就是書本。
翻開郭昶的進修歷程，發覺他最與別不同的地方是，他除了喜愛讀書外，還十分喜愛教書。從1982年開始，他便開始替一間商科學校教授地產實用代理課程，1995年他更開始替香港大學專業進修學院教授地產代理深造班。原來一切源自他的理念：「我大學畢業後就加入地產行業，憑着畢業前修讀地產代理證書課程，好快就掌握到做地產要訣，做咗三個月地產代理，就升職做置業公司經理，但當時並無一個課程，可以一畢業就識晒地產，於是我就去教地產班，初初教人過程中，經常被人問到口啞啞，但為咗解答學生問題，就迫住不停查書，久而久之識晒所有問題，所以我覺得教同學係可以同時進行。當然做嗰行讀嗰行就最好，可以學以致用，如果唔係讀完唔用好快唔記得；𠵱家學到嘅嘢，過幾年又會唔同晒，𠵱家學定又係戇居。當喺工作上可用得番讀書嘅知識，嗰種滿足感，包你話過癮。」
除了教學相長這個方法，Anthony亦傳授另一方法，予有志進修但又怕讀書的人：「首先你要搞清楚，不要因為讀書而讀書，唔係見隔籬嗰個有七個Degree就要讀夠八個。第二讀書唔係為搵錢，如果讀書淨係諗住搵錢，你會好痛苦，因為𠵱家讀完書係搵唔到錢。你要將讀書當成拍拖，同佢談戀愛。當你發覺上少一堂會肉痛嘅話，讀書時間就會好快過，然後你又會發覺，過程中你會得到好多意想不到收穫，例如你識咗一班新同學，因為你讀嘅係同工作有關課程，咁你嘅同學咪即係同你工作世界有關，他日呢班助力唔講得笑。
「讀書係吸收人哋精華又慳自己時間嘅最好方法，好似我讀嘅地產行政管理課程裏，其中一位講者係『樓神』蘇仲強，佢講點樣去Plan新鴻基啲樓盤，點樣每年賣一百幾十億嘢，呢啲嘢你唔去上堂，畀幾多錢都唔會知。所以我嚟緊九月又再報一個房屋管理文憑課程，讀完呢個課程我會有市政規劃同環境管理兩個專業Degree，可以做政府及大型屋苑，因為投標呢啲工程嘅公司，起碼要有兩個員工持有呢種牌照。呢樣嘢又係要讀書先得，等我讀埋呢個課程，整個地產生意我都了解晒，咁我就覺得好完美。」
至於在繁忙的讀書及工作後，他的減壓方法是：「每個人每個崗位都有不同壓力，我嘅減壓方法好簡單，就係拉二胡，因為音樂可以抒發情感，我份人唔會成日諗住錢咁市儈，唔記得錢就冇晒壓力。另外，飲紅酒亦係我減壓方法之一，兩者都幾有效。」
增值歷程
姓名：郭昶（Anthony）
職位：市場推廣董事
1982年：地產實用代理證書課程（商科學校）
1980至83年：香港大學地理系
1994至96年：地產行政管理專業文憑課程（SPACE）
2002年：（進修中）商場管理證書課程（SPACE）
2002年9月：（即將進修）房屋管理文憑課程（SPACE）
商場管理證書課程
學費：$8,700（共29節）
登記費：$150
開課日期：2003年3月
截止日期：2003年2月
修讀年期：約需5個月
查詢電話：29755633
網址：