雖然恒指上周五始終無法企穩喺萬二樓上收市，不過成個市嘅陣勢完全唔同晒，大藍籌嘅買盤紮晒馬，完全係一副想「開拖」格局，連一向無乜指標作用嘅盈富（2800），成交額升到億三港元，顯示出的確有新資金入市買貨。
喺上周四嗰日，已有卜架指出新錢流入港股，至於係唔係用晒嚟買藍籌就不得而知，不過伏勝就收到部份基金嘅動向，話佢哋今次會睇個市睇番好啲，尤其是呢排美股造番好，加埋吹緊復甦風，恒指應該唔止去到萬二點就算。不過佢哋話香港始終有好多隱憂，個市如果見到萬三點就一定會沽貨走人。
「生物科技股」上星期成為市場焦點，事關「誠哥」隻長江生命科技已經遞咗紙申請上市，好多投資者都開始諗定點樣入飛。不過伏勝就唔係好睇好啲生物科技股，事關每次當有隻非常有代表性嘅股份上市嘅時候，就好似當年隻tom.com（8001）咁，通常都會係熱潮炒到最頂峰嘅時候，所以各位都係要小心。
喺全城一片生物科技熱潮中，上個星期好多隻「生科股仔」都各自各精采，有啲單日就升咗成倍幾，不過仍然有好幾隻喺升完後陰陰吓跌咗幾成，就好似隻遠生醫藥科技（140）咁，禮拜二勁升倍幾後，連續跌番三個交易日。聽行家講，呢隻股仔今次升上嚟嘅古仔非常之牽強，話佢擁有生物科技概念，可以借「誠哥」申請緊上市嘅生物科技旗艦炒番一轉。其實間公司𠵱家嘅業務仍然係以物業投資為主，所謂嘅生物科技項目好多都重係未有盈利貢獻。以外國嘅經驗嚟睇，玩生物科技嘅公司都要勁使錢做科研，所以好多公司喺未有收益前就已經摺埋，加上隻股嘅財政狀況一般，各位都係少掂為妙。 伏勝