呢排唔知係咪阿松嘅《獅子山下》效應延續，於是個個都要講幾句細時捱過唔少鹹苦，就算連立法會班尊貴嘅議員，都要跟時髦講幾句「想當年」。民建聯葉國謙同八方講起，佢同孖生細佬葉國忠出世時，一家人住喺上海街六十呎嘅板間房，幾乎迫到摩肩接踵咁誇張。佢重話，食嘅就只係豬油撈飯、豆腐撈飯，重有一味叫麵包糕，就係將唔要嘅麵包皮，浸水再蒸成糕嚟食咁話喎。
阿謙講起舊事簡直停唔到口，原來佢爸爸葉老伯係做司機，不過唔係大富之家嘅司機，而係垃圾車司機，收入麻麻，所以佢細個家境都好窮。後來阿爸轉行揸的士，重間唔中車阿謙兩兄弟返學㖭（好似《獅子山下》橋段）。𠵱家回望過去，香港其實好多人嘅成長路唔一定順利，但係好似阿謙咁，努力工作一樣可以出頭。
傳真︰2623-9278
電郵︰