讀者David問：若本人想為自己嘅富士ImprezaWRXSTi，更換排氣系統，從而希望有更好嘅馬力輸出，但喺唔影響扭力輸出嘅情況下，究竟有甚麼好方法呢？另外，小弟若將生氣同排氣口打磨，請問咁做又能否有直接幫助呢？
David：其實STi版本嘅ImprezaWRX，經已有好多高性能嘅配件，根本唔使甚麼大型嘅改裝，若你換上過粗或過直嘅排氣系統的話，結果只會令引擎排氣回壓減低，造成喺低轉時輸出不足；另外，加上經常保持低轉行車，火嘴好易會聚積「碳屎」，因而令火嘴溫度過高，引起震爆或預燃等情況。如果真係想改善動力輸出的話，我哋建議閣下更換與原裝一樣大細，同埋粗度嘅不銹鋼蕉，因為不銹鋼比生鐵暢順，能喺高轉時改善渦輪嘅表現；不過，呢種原裝不銹鋼蕉嘅價錢頗貴，以香港製造嘅不銹鋼製品為例，價錢約$7,000。
另外，生氣口磨光的確係有助引擎呼吸時更暢順；不過如果生死氣喉用料，本身已經係高性能產品，就唔使再打磨，因為太過平滑會令空氣和電油不能混合，產生燃燒不良嘅情況。現時德國嘅DTM賽車大部份都不再磨光，而且重要加上來福線，使空氣形成漩渦，以加速電油和空氣嘅混合。
如果大家對汽車有任何問題，可傳真至27420542，或郵寄至香港將軍澳工業邨西駿盈街8號，《蘋果日報》副刊「車天車地」版「汽車Q&A」收，我哋會盡快為你解答。