賓架大食會，呢晚喺灣仔舉行，三十幾人齊集。大食會內，不成文規矩係只談風花雪月，不談公事，總之力求輕鬆，唔好裝模作樣扮嚴肅。眾賓架喺office已經夠晒緊張，坐埋一齊食晚飯，言笑無禁，無非係為咗減壓，聯誼吓啫，講公事做乜！
時事話題當然不離最熱門嘅賓架李事件，冇人鍾意呢類事情曝光嘅，不過既然俾狗仔隊影咗相，全世界都知，點都有一點兒尷尬。
賓架L話：「乜咁唔小心㗎？」賓架C話：「以後邊度都唔安全。」賓架K話：「呢啲係真正嘅私隱，唔應該周街知，可唔可以向私隱專員投訴？」賓架F話：「私隱專員只會在正面信貸資料庫嘅所謂私隱問題上大做文章，唔會顧及我哋嘅私隱。」
外資賓架T話：「我哋好似成為獵人目的物咁，唔知幾時會中箭，俾人擺上封面，好驚啫，左丁山你話嘞，我哋如何自保？」點自保？唔識答，大家惟有晚晚返屋企食飯，最好連Starbucks都唔去，費事俾人影相。賓架T諗諗吓，細細聲話：「呢排環境咁曳，唔係出風頭嘅時候，愈低調愈好，不如唔好賣廣告住，睇定吓，以後再同廣告公司商量過先啦。」大家冇乜反應，講過第二個題目。
以往眾賓架對啲八卦嘢，好少咁大反應，大家講完笑吓就算，𠵱家就覺得狗仔隊逼人太甚，條氣好唔順，至於後事如何，木宰羊。