點樣可以用最經濟方法現場睇今屆世界盃。參加抽獎等運到？NoWay！以下由一位意大利忠實擁躉，介紹唔使八千蚊，就可以現場睇意大利對厄瓜多爾和克羅地亞兩場分組賽嘅實例。
現年二十八歲嘅劉偉麟（Kenneth）係信用卡中心文員，去年十一月成功喺網上購得三場意大利分組賽波飛後，立即向公司申請假期。不過，Kenneth因與女友結婚，使咗大筆積蓄，喺銀根極度短缺下，呢位意大利球迷最後諗到呢個「絕世好橋」嘅辦法。
揸住計算機嘅Kenneth說：「去日本，食、住、行一定要平。食方面每日預計百五蚊（港元計算）；住嘅係「民宿」，平均一晚二百蚊；而交通就選擇最平嘅西北航空同JR（日本鐵道）七日通行票（見附表）。加埋一千五百五十蚊三場世界盃波飛，全部總支出約為一萬。」
「由於唔夠經費同只有七日假期，到時我會賣咗意大利最後一場對墨西哥嘅門票，預計可以收番一千蚊。重有，我和同行朋友已決定帶齊顏料，準備臨場幫各地球迷畫臉、畫國旗，我哋預計到時收二百円一次（約十二港元），希望可以賺到二千蚊港銀幫補吓。」圖?文：李勇明