內地遊客來港大增，酒店整體入住率上升，自然益到酒店業從業員，起碼唔使驚炒魷先。酒店B同左丁山講：「三四星酒店大旺，四五星酒店亦較為好景，睇落我哋呢行有排做，直至迪士尼樂園落成都唔使驚。迪士尼開業後，形勢應該重會好啲啩，由𠵱家到二○○六年，香港應該會增加近一萬間房。」
咁講法，中大開辦酒店管理學院，咪幾合時宜，畢業生肯定唔會失業，十幾年後好有機會做「管理高層」。酒店B話：「我就驚香港大學生唔捱得苦。歐洲酒店嘅傳統係酒店專科生由低做起，刨薯仔都要起碼一兩年，大部份嘅酒店總經理都係由F&B（飲食部）升上嚟嘅，中大酒店系學生如果只讀管理理論，未必掂㗎。」
大作家位公子去咗澳洲讀酒店管理，據大作家講：「個仔走入學校實習酒店廚房洗碟六個星期，再刨番茄薯仔六個星期，到管房部學清潔房間六個星期，之後再到其他部門，做到雙手痠軟之後，先至到課室上堂學理論。幾好吖，啲細路係要捱吓嘅。」大作家又幾睇得開，自己以前靠枝筆，現在靠部電腦，寫到生活逍遙自在，個仔枝筆梗係唔及佢十分之一，但到咗澳洲肯捱肯學，幾年後在酒店業應有出頭之日。中文大學亦有一間新世界酒店可供學生實習，兩三年後落成，到時啲學生亦應學習洗大餅至啱。