張東琳近年幕前工作唔係好多，但佢嘅生活就好富貴。舊年佢同爹哋喺上海斥資四百萬港幣買咗一層四千幾呎嘅樓，近日佢又用咗五百七十五萬喺跑馬地藍塘道樂園買咗一個單位自住。
馮仁昭聽講跑馬地呢個單位有一千六百呎，張東琳早前同一個中年男士去嗰度睇樓，佢哋好快就決定買咗嗰個單位。不過，層樓雖然寫張東琳個名，但係有二五同馮仁昭講，最終畀錢嘅係同佢去睇樓嘅中年男士。
張東琳舊年喺上海買嘅豪宅，總共有四房三廳。佢當日話買呢層樓嘅時候，主要係想方便爹哋去上海做生意時，有自己嘅屋住。張東琳早前話佢上海間屋裝修連添置家具，差唔多使咗接近一百萬港元，而好多新款電器重係佢喺香港帶返去嘅。
最近有消息傳出，話美國方面有人投資九千萬港元，開拍一部名為《比爾的咒語》嘅電影，重搵咗美國前總統克林頓夥拍章子怡同李連杰。馮仁昭聽咗之後覺得可能性極低。章子怡前晚去新加坡為美寶蓮化妝品宣傳，被記者問到呢個問題時，佢都忍唔住笑，章子怡經理人話：「沒有這樣的事情，我可以發誓。」
林子祥（阿Lam）噚日喺九龍塘又一城行街街。問到阿Lam佢老婆葉蒨文喺邊度時，阿Lam好友善咁對記者話：「佢要做嘢嘛！」不過最令人覺得奇怪嘅，係阿Lam竟然喺大熱天時之下披住頸巾行街，真係令人莫名其妙。
人氣組合F4原定應邀出席聽晚喺上海舉行嘅「五一九主題音樂會」，但日前傳出因為主辦單位冇批文嘅關係，令到F4要取消參與呢個活動。噚日F4嘅經理人喺台灣向傳媒解釋，重攞咗批文畀記者睇，佢話F4聽日一定會出席個活動。
朱慧珊噚日以亞視節目《群雄奪寶》主持身份，喺太古城中心出席圖書嘉年華活動。朱慧珊重同現場觀眾大玩《群雄奪寶》遊戲。不過佢亦唔放過睇書嘅機會，一得閒就去睇圖書，原來佢對中國傳統書籍情有獨鍾，最終佢買咗一本有關書法同經文嘅書。