真係莫怪小初長氣，雖然呢個星期內已經寫咗兩次光通信（603），但因為事件實在太古怪，所以小初今日不得不再花篇幅講一講。
前日小初同經紀陳傾開，光通信傳收購中國發展（487）一事令人奇怪，噚日又爆出光通信投資大陸天然氣項目嘅合作夥伴中國石油天然氣管道局，走出嚟話光通信個項目唔掂，兩單嘢發生時間咁巧合，小初同經紀陳都覺得件事唔簡單。
家陣雖然唔肯定以上消息堅定流，但光通信因搞收購停牌，投資者想沽貨避一避風頭都唔得，唔知係咪呢個原因，同係上海幫炒開嘅上海策略置地（164），噚日突然沽壓大增，俾人掟到暈，大跌18.92％，收30仙，成交金額有成1820萬元。
由於事件太離奇，如果光通信唔將件事解釋清楚，睇怕復牌之後，股價唔慌好睇。 慕容小初