中移動（941）有好消息入市，趙飛雲噚日晨早去股票行睇市，頭一個小時好淡爭持頗激烈，11點幾以後好友開始佔上風，趙飛雲亦喺0.60元買入20萬份長實輪9043，加大投資注碼。恒指午市一度升破萬二關，高見12021，可惜高位有回吐，最後升141點，收11974。
恒指噚日雖不能守住萬二關收市，但收市價11974已是過去9個月新高，而且守住頸線之上收市，如果假期內無特別利淡因素出現，下周升破萬二關及進一步拋離的機會甚大，雙底量度升幅，中線可見13600。
中移動噚日配合大成交勁升5.6%，收27.30元，睇走勢有餘未盡，下周有機會挑戰250日線（現處28.27元）。不過趙飛雲一向覺得中移動難玩，變數太多，所以唔敢追捧。噚日情願高追隻長實輪9043，話晒贏開有感情，博下周二港股裂口高開，長實可以突破77元阻力位，上試80至82元水平。
和黃（013）噚日雖然相對升得少，250日線71元暫有阻力，但估計今次再闖關，確認升破機會大，下周甚至可能衝破近期72.25元高位，上試75至77元。 趙飛雲