港股噚日牛牛皮皮，恒指收報11832，跌5點，成交金額達81.18億元。大市處於悶局之際，中移動（941）突然宣布以102億美元收購國內8省市業務，比市場預期之數少咗一截，加上Vodafone增持中移動新股，令中移動集資壓力大減，後市班大戶可能會借勢炒上。中移動昨收25.85元，跌0.58％。
數通集團（8030）配售1億股新股，每股作價0.10元，集資1000萬元，配售價較停牌前收市價0.15元折讓33.33％。
噚日數通復牌，股價不跌反升，收0.201元，升34％，較配售價高出1倍。據聞接貨者短期內都唔會沽貨，直至股價喺高位徘徊一段日子後至開始出貨。此股一向貨源歸邊，幕後人暫時應該可以維持秩序。
光通信（603）噚日又停牌。有炒家抱怨話公司經常停牌，會增加俾人斬倉風險，真係炒得唔安心，不過冇計啦，鬼叫佢動作多。
ｉ師傅話，今次停牌係因為要將旗下互聯網投資全數賣畀一間上市公司以換取其控股權，藉此將業務清晰化，好向投資者交代，表明自己唔係科網股，而係燃氣股。
慕詩國際（130）呢個禮拜繼續穩步上升，直逼2元關口，不過成交只係一般，似乎唔多散戶跟進，幕後人日後都唔知點散貨。
阿 虎