薛家燕、陳彥行、梅小惠、阮兆祥、林漪娸、鄧兆尊同趙學而等，近日忙於為無綫劇集《皆大歡喜》趕戲，佢哋重要喺臉上畫大花臉，樣子古靈精怪。
呢場戲主要講述陳彥行因為留喺宮中生活覺得好無聊好悶，有一晚佢心血來潮，趁大家瞓着覺，陳彥行就喺各人嘅臉上大畫花臉整蠱一番，但後來事敗，陳彥行卻賴係廖碧兒搞鬼。
喺拍攝前，陳彥行、林漪娸同阮兆祥等各自為自己嘅粉臉上妝，可能由於近日電影《蜘蛛俠》掀起熱潮，所以佢哋幾個演員都喺臉上化上蜘蛛網嘅妝，十分搞鬼。而梅小惠就將粉臉化做成老鼠，重加咗一啲鬚，好鬼可愛。梅小惠話：「細個我睇過兒童節目《閃電傳真機》，見到有人扮老鼠好得意，所以我咪試吓化囉。」
四人組合F4原定今日去上海準備出席星期日舉行嘅「5-19上海足球主題音樂會」，莫文蔚、AirSupply、黑豹樂隊都係嘉賓之一，但噚日大洋網消息，指有關方面仍未攞到批文，所以音樂會可能取消。不過負責嘅蔣先生就話文化部已作口頭批准，所以批文應該冇問題，但其實要喺內地開騷，一日未得正式書面批文，一日都唔可以咁老定，不過F4經理人就話，除咗音樂會外，F4喺上海重有其他活動，所以無論如何，F4上海之行都唔會取消。
關心妍近排為咗搞自己個新形象而煩惱，頻頻要人畀意見，佢噚日着住件小背心喺港台出現，即刻俾記者問佢係咪想走性感路線？佢話初入行時個形象好Cool，好似唔係咁受落，所以係時候要轉一轉，至於點改法就重未諗到，佢重話就算走性感路線都無所謂，不過就唔會咁刻意。
黃子華舊愛劉婉君最近宣布同任職廣告界嘅男友Bosco訂咗婚，出年一月重會喺香港擺喜酒，廣宴親朋。馮仁昭有個朋友係劉婉君嘅「麻雀腳」，佢話婉君同男友Bosco最喜歡拍拖去打通宵麻雀，佢哋兩個喺麻雀枱上好鬼恩愛，成日講埋啲肉麻兼骨痹嘅說話。不過，佢哋牌品都唔錯，但就成日邊打牌邊呻窮。
安雅嘅性感打扮，往往叫人眼前一亮。佢自從拍完張玉珊個「修身堂」廣告，已成功奠定「性感女神」嘅形象，而且人氣亦大大提升。馮仁昭個台灣朋友有一次嚟香港玩，佢一睇到安雅嘅報道，就認到安雅曾在台灣做過酒吧侍應，不過，安雅𠵱家同當年比較，就梗係愈嚟愈正啦。
趙薇同以前嘅內地富商男友葉茂青，二人分手後做唔成朋友，但葉茂青𠵱然好鍾意同女星交往，由於佢出手闊綽，所以都好受歡迎。馮仁昭聽聞葉茂青近排好想投資香港電影，佢重諗過同性感靚女舒淇合作，因此佢之前約咗舒淇同一班朋友去夜店蒲，商討合作拍戲嘅事。