小初星期二提過，同經紀陳就中國發展（487）急升一事輸賭，究竟係因為大股東同時係光通信（603）執行董事借勢炒上，定係因中國發展可能賣殼而急升。
兩間公司噚日晏晝齊齊停牌，跟住市場就傳出光通信可能洽購中國發展控制權。換言之經紀陳同埋小初收嘅料同樣堅，大家冇贏冇輸。
不過，對於光通信炒到㷫烚烚之時，失驚無神走去買隻殼，經紀陳同小初都覺得奇怪。首先，光通信由科網殼股變身投資大陸天然氣，究竟係咪可以搵大錢要將來先知，但起碼有大孖沙和記黃埔（013）同埋殼王德祥企業（372）肯認購佢嘅可換股債券，借錢畀佢使，兼且有外資行吹捧，但家陣光通信無厘頭買間盤數唔多靚嘅中國發展，你話投資者會點睇？
除非光通信炒浪已到盡頭，要搵多隻殼嚟炒就作別論，但𠵱家睇落又唔多似，所以大家諗極都唔明。
慕容小初