𠵱家隨英格蘭國家隊到杜拜進行集訓嘅史高斯，唔知係咪操到儍咗，竟大大聲話會為求助球隊贏波，不惜世界盃上喺禁區插水博十二碼。
國際足協為咗打擊球員嘅詐騙行為，講明會對存心搞到對手出場或喺禁區內插水博十二碼嘅球員，施以重罰，一律將佢哋紅牌趕出場。家陣史高斯咁高調咁講，好聽啲就係夠膽挑戰權威，難聽啲講咪即係傻仔囉！
事關啲球證肯定會因為史高斯嘅言論而對佢格外留神，到嗰陣時史高斯莫講話想博十二碼；就算真係喺禁區俾對手踢跌，球證都會因為佢嘅出位言論而覺得佢係詐死。
英格蘭經已冇咗謝拉特，碧咸狀態未復十足；而戴亞又因傷而上陣成疑，如果史高斯喺比賽中有乜差池，睇怕英格蘭可以喺首圈後執埋行李返屋企囉。
烏拉圭話晒今次嚟同中國友賽都叫做強陣，自然吸引唔少內地記者到佢哋下榻嘅酒店大堂等球員出嚟時影相；但就俾保安阻止，話因為球員肖像權問題所以唔准影。點解唔係私隱權，而係肖像權？重有除咗列高巴之外，我求大俠就覺得冇乜邊位有肖像權價值可言喎。
唔知各位球迷有冇留意到今年嘅NBA季後賽次圈出現一個怪現象，就係東、西岸四場大戰全部以四比一玩完；而且四支晉級嘅球隊都係東、西岸常規賽排名第一同第三嘅隊伍，唔知係咁啱得咁蹺抑或事有玄機。我求大俠真係百思不得其解，唯一可以肯定嘅就係全部都大熱勝
巴西班國腳早排話，擔心今屆世界盃個專用波太過輕同太過大，影響佢哋發揮。但計我求大俠話，未必係呢個「三間」（adidas）製造嘅波唔好踢，只不過全巴西國家隊係「一剔」（Nike）贊助，陣中多位成員好似朗拿度、卡洛斯及朗拿甸奴等嘅贊助都係「一剔」，故點都要彈吓呢個「三間」波啦！
卡斯拿斯喺前晚場歐冠盃決賽後備入替受傷嘅施薩，打得不知幾好，救咗三個必入球，幫皇馬捧走冠軍獎盃。不過我求大俠覺得最令卡斯拿斯開心嘅唔係攞咗冠軍，反而係有機會來季搶番個正選位。事關佢季中因打得唔好而被棄用，但𠵱家做咗英雄，睇怕喺教練迪保斯基心目中可以攞番好多印象分。