海外車訊：
福士TouaregSUV界新寵兒

喺今年嚟緊嘅巴黎車展上，福士車廠將會展出一款全新SUV——Touareg；新車不但造型極富剛勁感外，廠方更為其安排有豪華味十足嘅車廂布局、輸出強勁嘅3.2公升V6電油引擎等等，從而希望吸引更多車迷注意。不如今日一齊嚟先睹為快，睇睇全新嘅Touareg究竟有何吸引力啦。

記者：鄭達基

豪邁造型吸引度十足
全新福士Touareg嘅造型，雖然沒有如其他同類型四驅SUV般，來得咁硬橋硬馬，但極富肌肉感嘅車身線條、闊大嘅胎軨組合等等，不但能夠展現出Touareg剛勁嘅一面外；一組炯炯有神嘅頭燈，襯以闊大鬼面罩組合，望落更見有一份貴氣㖭。

車廂寬敞設備齊全
由於呢部Touareg嘅車長達4750mm，而軸距亦有成2860mm，不但能營造出闊落嘅車廂空間外，匹配承托力十足嘅座椅，因而令乘坐舒適度不俗；另外，雖然未有關於Touareg車廂配搭嘅詳細資料，故未能確實其有關配搭，但一般相信新車嘅車廂陳設，將會與同廠嘅Phaeton豪華轎車相類似。而經過強化嘅車身結構，配合車上多個安全氣袋，亦能有助保障車上乘客嘅安全。

引擎配搭選擇多
喺新車推出初期，暫時只會有一台3.2公升V6電油引擎（馬力220匹），同埋另一台5.0公升V10TDI柴油引擎（馬力313匹）供用家選擇；但隨後廠方會為Touareg，安排有多一台4.2公升V8電油引擎等等，以迎合不同用家嘅需要。而一套懸掛系統，當車速達125km/h或以上時會自動調低25mm，配合一套四驅系統，從而可增強高速行車時嘅循迹性。