潘廸生噚日下晝好似食咗火藥咁，響尖東廸生集團門口同記者講：「我係離過兩次婚，但每次都同第三者無關！」
唉！八方唔明李國寶貴為東亞銀行主席，佢舅仔潘廸生亦都係上市公司主席，點解會咁沉唔住氣呢？
問題可能就因為係家事。寶哥哥同廖碧欣結伴遊巴黎俾周刊踢爆之後，佢應付傳媒一直揮灑自如，真係做足一百分，但自從潘廸生加埋把口，話第三者要檢討道德，第三者嘅父母都要多啲教導子女，佢就千年道行一朝喪，連續有出位言論。
潘廸生噚日咁鬼躁，怕且係因為寶哥哥就第三者道德問題反駁，叫人問吓潘廸生父母，佢哋個仔私生活點樣，結過幾多次婚。
記者噚日就問潘廸生，李國寶咁大聲數佢情史，會唔會影響潘與太太余桂珠嘅感情，佢話相信唔會影響。記者又問潘廸生會唔會同姐夫寶哥哥坐低飲番杯，傾一傾，佢就唔回應。
潘廸生結過三次婚有自己原因，李國寶有美同遊又話係「誤會」，八方建議佢哋兩親戚不如坐低飲番杯二十四味，唔好日日面口咁難睇啦！
E-mail：