又到一年一度ComputerExpo大日子，呢個屬香港首屈一指嘅電腦界盛事，每年都吸引唔少參展商同入場人士，雖然今年一眾網站已經消失晒，不過各大參展商一樣有睇頭，而且不約而同大力催谷旗下產品，當中尤以大堆數碼相機、攝錄機等影像器材至為突出。 記者：朱崇德、徐影龍
攝影：徐影龍
SONY展館在場中極為矚目，每種數碼產品都設有獨立攤位，不但有齊旗下熱賣機種任試任玩，重有靚女Model教你用機，陪你影相。由於SONY新機攻勢在電腦展前已悉數出籠，所以論吸引力算係So-net攤位，除咗即場勁Sell$188無限上網外，重有兩位惹火女郎着住比堅尼協助推廣，難怪引嚟大班人圍觀試用。
自從Logitech收購名牌喇叭公司後，一直大搞電腦影音喇叭。場中設有專用試機室，供入場人士感受靚聲魅力。呢套喇叭一樣以民用價錢而可享受高音質為賣點，試聽後發覺高低音表現不俗，打機睇碟都有唔錯表現。可惜暫時只支援THX音響制式，即4.1系統，想享受AC-3或dts嘅5.1系統，大概等到七月先有貨。
經濟不景，產品都以平價高質作招徠，MICROTEK最搶眼係ScanMaker4900，光學解像度達到4,800dpi，掃描色深為48bit，全部以硬件運算，的確厲害，賣價$1,399，重包埋燈箱，畀你玩埋正負片菲林，算係唔錯嘅選擇。
雖然EPSON並冇新款打印機供試用，不過展館中卻擺放一部重未出街嘅Sample機，呢部打印機設有LCD屏幕同CF、SM記憶卡插槽，主要玩免電腦直接打印，較特別係設有自動Cut紙設計，印製如大型Banner等長紙就非常方便，外形頗吸引，可惜賣價同發售日未定。
ComeMon以芒聞名，場中除展示一系列電腦用LCD外，亦有旗下首款Plasma等離子大電視，現場觀看感覺不俗。值得一睇係全港首部CarPC(汽車電腦)，場中擺放一部真車作示範，重有靚女教用GPS、睇碟等玩法。
場中設有兩個試影攤位，其中專業級專區擺放多部如D-60等Pro機，全部配上大鏡頭任試任用，最正係有靚女坐定定任你影，全身CloseUp任影唔嬲。
SONY試影專區較為搞鬼，並非用靚女做Model，而係擺缸魚喺度任你影，試玩機種包括CyberShotP系列新機，入場人士可一試微距攝影、自動拍攝等效果，場中另有多款新數碼攝錄機。
最新從日本抵港的214萬像素入門級數碼相機PDR-T10，喺呢度都有得試玩！此機最大賣點係機身面蓋採用換殼式設計，可以配合你唔同嘅衣着或心情而隨時轉款，今次喺COMPUTEREXPO可以一次過見齊8款特別色機殼。
ComputerExpo2002入場資料
地址：香港會議展覽中心一號展覽廳
收費：$20
開放時間：
5月18日（10:30?0:30）
5月19日（10:00?7:00）