當年，重新打入香港市場嘅現代車系，旗下一款用上1.8公升直4Turbo引擎嘅Coupe，經已成為眾矢之的，兼且備受車迷注目。然而，踏入2002年剛面世不久嘅第3代Coupe，不僅外形予人有脫胎換骨之感，設備之先進及手工之精巧，更令人留有深刻印象。而新款Coupe一台2.7公升V6偈，匹配一套4前速Shiftronix半自動波箱，所誘發出一股強烈嘅跑車氣息，重予人有蠢蠢欲試嘅誘惑呢！
記者：陳偉林 攝影：陳偉強 ImageGirl：Wing
經過多年嘅蛻變，呢一代全新現代Coupe，唔再係停留於中小型嘅房跑車格局，而係一部講求個性、線條同品味嘅高級跑車；佢一身誘人嘅輪廓，加上一對炯炯有神嘅雙圓大燈，重有完全脫離一貫韓國車風格嘅扁長鬼面罩設計，以及兩旁輪拱嘅透氣柵格點綴，絕對可媲美同級日本車製作呢！
講到車廂陳設，呢部屬頂級版嘅Coupe，除用上高級真皮鑲嵌之餘，車廂四周重有金屬面板裝飾，帶出濃烈嘅跑車High-tech味道外，一雙桶形跑車座椅組合，既貼身重好有一份承托感。而高聳掀背之下，重有418公升容量嘅尾廂空間呢！除電窗、電鏡及大型電天窗外，重有原廠恒溫冷氣同高級音響組合，當然唔少得重有前排四個安全氣袋配搭啦！
全新現代Coupe，用上一台2.7公升V6DOHC引擎，匹配有一套4前速Shiftronix半自動波箱，性能表現不俗，但稍嫌未能盡顯引擎所長。然而，引擎運轉順滑寧靜，卻欠了點爆炸嘅剛勁度；不過，新車底盤結構穩紮之餘，四輪歐式懸掛設計，加埋電子TCS循迹系統，以及四輪碟煞跟ABS連EBD裝置，走彎穩妥又見有對地抓着力足㗎！