北上創業無疑開食肆最穩陣，皆因中國人最鍾意食。不過，開食肆除咗店舖要人流夠多之外，投資金額當然愈少愈好，不但租金要合理，裝修、人工、爐具成本亦要輕，而且最好自己亦係做食肆出身，唔怕被廚房夥計翹起。已有26年做廚房經驗嘅陳先生，就憑26萬人民幣喺深圳東門步行街開咗間「百味亭」；雖然創業只得3個月依然未回本，但勝在投資額唔算多，他自信來年會有可觀嘅盈利。
記者：梁煒健
攝影：黃子偉
40歲嘅陳先生由14歲入行開始，一直喺香港當廚師；擁有26年中菜經驗的他早已係師傅級人馬，開食肆自然駕輕就熟。但點解要揀深圳創業？
「無他，香港經濟環境愈嚟愈差，差不多每個月都有大型食肆關門，而港人亦習以為常北上消費，尤其喜歡品嘗又平又正嘅食物。於是上年年尾，我就決定喺羅湖東門步行街鴻展廣場一樓，投資26萬人民幣開咗間『百味亭』。」
去年年尾，由於有朋友向陳師傅介紹，東門有吉舖出租，1,400呎舖位只需2萬1千蚊人民幣，就算點計都咁抵。雖然間舖喺廣場嘅巷尾，但由於整層店舖已全部租出，有大型PizzaHut撐腰旺場外，同期又有兩間由港人開辦嘅食肆加入，東門太陽廣場又喺對面，有咁好嘅營商環境，陳師傅自然對呢盤生意有信心。
由於陳師傅曾經在台灣做過6年廚師，所以處理台灣小吃自然有一手，做台灣菜固然駕輕就熟。「喺深圳搵台灣菜師傅亦容易啲呢！而𠵱家我哋五位廚師均為四川人，所以順理成章『百味亭』亦做埋四川菜。唔知係唔係我哋廚師嘅關係，以及喺深圳嘅四川人較多，所以為咗迎合呢班顧客，我哋嘅台灣食物都會帶點辣味。」
由於陳師傅仍居住香港，為咗要親力親為打點店內生意，不惜每日費時來往深港兩地；中午上深圳，晚上關閘前返港。「淨係呢啲車資已經用咗港幣二千幾蚊，重未計平時上嚟吃喝玩樂嘅費用；使費雖然係勁啲，但都係親自上嚟昅實盤生意好啲！」
「百味亭」於一月份開業，雖然春節帶來可觀嘅收入，但畢竟三、四月份均為飲食界淡季（不論香港及深圳），所以平均每月盈利只得?4,500，亦不足為奇。「喺呢段困難嘅日子裏面，我哋惟有節省開支，例如水電就盡量節約。嚟緊嘅7、8月份，由於係暑假關係，上來深圳玩嘅港客特別多，生意自然會有轉機，希望到時生意可以做到理想嘅目標啦。」
做服務性行業，員工有禮絕對係重要嘅一環，正如一般內地食肆一樣，未正式開張之前，被聘請嘅侍應均需接受培訓。「雖然員工有收入，但我哋一樣包食包住。而主要係教基本嘅服務禮貌，例如上菜及招呼客人等基本態度。至於廚師因各人已有多年經驗，大廚甚至有10年資歷，所以一般唔需要培訓，只要佢哋熟讀每樣菜式嘅配料單就OK。」至於薪金方面，內地一名廚房嘅月薪約?1,000，侍應則?800左右。
由於係小本經營，所以投資金額有限；陳師傅幸得朋友介紹，搵到深圳當地大型裝修工程承辦商商討。由於呢類承辦商打價已比市場上嘅裝修公司平，若以香港同類型食肆比較，足足平咗40%；裝修及廚具雖然平，但品質優良。我舖頭內嘅枱枱櫈櫈，就係喺盛產家具嘅順德入貨，木枱入貨價為?120，而優質嘅木櫈，售價都只係?70一張咋！」
做食肆另一重要環節就係宣傳，由於業主為國內人，一般都不會替租客宣傳；即使陳師傅願意出錢，業主亦唔多願理。但幸好佢哋成功跟廣場一樓其他嘅食肆，一齊向業主申請，希望做招牌宣傳，結果喺集體嘅壓力下，業主終於勉強答允協助。除咗商場門外有掛板廣告，陳師傅亦搵專業食物造型公司做食物模型，擺放於店外兩邊作招徠；而且不惜工本搵攝影師拍食物硬照hardsell店內套餐，及聘請女侍應在食物廣場入口作生招牌。
雖然百味亭剛起步，但陳師傅自然有其拓展理想。若生意日趨穩定興旺，將會在羅湖區附近開多一間連鎖分店，皆因羅湖區人流始終較多，而最佳選舖位置，將會是日後嘅深圳地鐵站附近。由於地鐵站將於2005年才落成，陳師傅謂現時仍言之過早。
1﹒地方清潔舒適，廚房乾淨最重要。
2﹒食物不停改進及增加款式，必會增強市場競爭力。
3﹒事事親力親為，力不到不為財。
4﹒員工待人有禮，顧客自然唔會失。
百味亭開業本錢
投資日期：2002年1月
租金（約1,400呎連1月按金） ?42,000
裝修 ?150,000
人工（廚師5名、侍應7名） ?12,000
入貨 ?20,000
宿舍 ?2,500
雜項 ?20,000
流動資金 ?20,000
總投資額 ?266,500
平均每月營業額 ?60,000－?80,000
平均每月盈利 ?4,500
目標每月盈利 ?30,000
1﹒地址證明：找合適舖位後與業主簽訂租約，作為地址證明。注意在東門步行街地下不能開設食肆，小吃零食店除外
2﹒工商牌照：到羅湖區工商分局以個體戶形式申請工商牌照
3﹒稅務執照：稅務執照包括國稅和地稅，可往深圳稅務處辦理，約一星期便可
4﹒衞生牌照：需向羅湖區衞生檢疫站申請，費用約?200
5﹒消防牌照：開食肆最重要申請消防牌照，需在裝修前先出示圖則去報批，而申請處為羅湖消防中隊
聯絡我們
面對香港經濟不景，裁員不停，失業率持續上升，香港經濟逐步轉型，人人北望。「北上創業」版訪問一些香港人在內地成功創業的例子，如閣下是其中一分子，又願意將你的經驗跟讀者分享，請聯絡我們。來信請寄將軍澳工業邨西駿盈街八號《蘋果日報》副刊「北上創業」版收或傳真：27420542。請附聯絡電話。