美股大漲小回，港股噚日窄幅上落，高低波幅唔超過80點，但期指未平倉合約累積則愈來愈大，高達54716張，單係今個星期已累積超過3000張，睇嚟好淡下周開始會有動作，輪到港股走勢變過山車。
趙飛雲呢個禮拜掛咗幾日免戰牌，主要係港股調整較預期細。恒指周一下試11630後已迅速調頭，過去兩日基本上喺11800水平徘徊，因此市場一般建議喺11500附近買貨嘅算盤固然打唔響，連對個市睇法稍為偏好嘅趙飛雲，想喺11600附近博反彈，亦未能把握一瞬即逝嘅機會。
港股噚日跌唔落，而下周一又係假期，趙飛雲怕大戶突然開車，到時可能追唔切，現時兩手空空，怕錯過今次升浪，所以點都要搵點貨揸手。
本來今個禮拜嘅目標係長實Call輪9043，但長實（001）除息後抽高，呢兩日喺76元徘徊，高追9043始終有啲唔甘心。噚日退而求次，尾市喺0.425元買入20萬份和黃Call輪9050。
趙飛雲揀9050，主要覺得和黃（013）短期上升空間較長實大，值博率較高。和黃短期如企穩10日線70元之上，要升破近期高位72.25元應該唔難，如回頭跌穿68元，則9050要先計數。
趙飛雲