手表推動嘅方法多不勝數，由人手上鏈、電池、自動表到光能，每一種都各具特色。美國手表品牌Dakota，專長推出鋼表及鈦金屬表，上年突破性地推出磁力發動的手表，於美國開賣時反應唔錯，𠵱家剛剛引入香港。其賣點係只需充一次電就可以行足一年，好處係唔使開表換電，令其防水性能保持最佳狀態，絕對係光能手表以外，另一種環保發明。
記者：張穎倫
攝影：伍慶泉、陳穎
ImageGirl：Don
最大路嘅鋼表款式，加埋黑色表面極之踏實，戴住佢一啲都唔誇張。內涵方面除咗主打嘅磁力發動外，亦有330呎防水性能同日期顯示。值得一提係表帶採用七珠帶，戴上手嘅感覺幾幼細舒服。美中不足係表面只得36mm直徑唔夠大，如果加多2mm外形就更靚仔。
型號：DakotaFieldREQ
售價：$1,780（TWWATCH）
呢款電磁表嘅款式同一般手表無乜分別，表帶、表殼都以全鋼製造夠晒硬淨，而且又係石英表，準確度有保證，防水性能亦唔錯。負責開發嘅廠商一口氣推出11個不同款式，男、女裝一應俱全。
唔單止男仔可以戴電磁表，就算女仔亦有OL表款可供選擇。好似呢隻長方形表面嘅電磁表，表面上嘅阿拉伯數字擺放極之鬼馬，而表殼同表帶嘅銀色閃得嚟又帶點高貴，襯斯文Look最啱。不過防水功能只得165呎，要玩潛水就要戴過另一隻表啦！
型號：DakotaBerengerREQTank
售價：$1,780（亞洲表行）
如果嫌Classic款太簡單的話，呢款黑鋼顏色就夠晒有型。潛水計時圈可作逆時針方向轉動，方便計時，唔係裝飾咁簡單。再加埋放大日期，就算喺水底亦可清楚睇到，防水能力亦有330呎，呢個夏天戴住佢玩水上活動就最啱！
型號：DakotaREQSport
售價：$1,780（亞洲表行）
星辰嘅XC系列手表，自從搵咗陳慧琳做代言人之後，大家都慣咗叫佢做KELLY表。但一直以嚟嘅KELLY表都係以電池推動，冇乜突破。最近佢哋就推出首隻以光能推動嘅表款，只要有太陽或燈光就會自動充電，同一般光能手表同樣方便。長方形黑色表面配襯小巧設計，當然係OL嘅摯愛款式。
型號：CITIZENDURATECTEco-Drive
售價：$1,480（TWWATCH）
自動表唔需要任何能源推動，只要經常戴住就不斷運行，所以價錢明顯比其他表貴。而呢款新出嘅波爾表就比較抵玩，一隻表有齊24小時顯示、潛水計時外圈、660呎防水功能等，又係鈦金屬製造，最厲害係有齊星期、日曆。瑞士製造，功能比唔少貴價自動表更多。
型號：BALLDM1012-BK
原價：$6,380
特價：$4,466（TWWATCH）
專睇潮汐嘅釣魚G-SHOCK一直都有唔少人捧場，啱啱更推出新款啫喱表帶，有黃色、紅色、藍色任揀。其中黃色啫喱睇落最Sharp，一到貨就大賣。功能方面，有齊全世界潮汐紀錄、計時、響鬧及自動背光顯示等，價錢唔算貴，年輕一族最啱。
型號：CASIOG-SHOCK2463
每款售價：$499（TWWATCH）
香港人愈嚟愈注重健康，做運動時都想計算吓心跳，以觀察身體狀況，所以唔少手表都加入探測心跳功能。之不過佢哋大部份都係以量度手腕嘅脈搏為主，做劇烈運動時身體擺動極大，難免令計算出現偏差。所以新一代Nikehrm，就加設脈搏探測器佩戴於胸前，直接量度心跳，保證更加準確。
型號：Nikehrm﹝triaxinspire
售價：$699（TWWATCH）
呢隻表既可以報時，重有齊日期、夜光同100呎防水功能，更設有防撞膠邊同防震功能。另一方面，佢又設有指南針同華氏溫度計，甚至連求救用嘅LED燈都有。絕對係一隻全能表，乃露營遠足嘅好幫手！
型號：DakotaOutdoorClip
售價：$880（亞洲表行）
售賣點
TWWATCH（23329639）
旺角彌敦道628號瓊華中心U30店
亞洲表行（29722278）
銅鑼灣東角道24-26號怡東流行通地下18-19號舖