張曼玉和法籍導演阿薩耶斯離婚，有傳第三者是梁朝偉，劉嘉玲日前接受有線主持毛舜筠訪問，表示和偉仔一個心急、一個冷靜，兩人水火不容，但感情依然要好，不會因對方的緋聞而嗌交。
與梁朝偉拍拖十多年的劉嘉玲，日前接受有線娛樂台節目《好女人系列》主持人毛舜筠訪問，透露現時和偉仔各有各的空間，但互相信任，自己很滿意現時的感情狀況。
劉嘉玲說：「我做嘢唔會發脾氣，我只會對最親嘅人發脾氣，做我男朋友都幾慘！我個人性格咁急，而佢又咁冷靜，根本係水火不容，發生問題，我要第一時間傾，去打開個結，而佢就順其自然。佢話我『咁躁做乜』，不過之後發現隔一日傾個問題會好啲嘅！
「身邊嘅人對自己影響好大，佢（梁朝偉）教我做決定之前諗三秒，我係口快過腦嘅人，都未諗清楚就應承咗人，但佢極冷靜，太冷靜有時又唔係太好，機會喺面前，左諗右諗，諗得嚟都走晒啦！」
另外，毛舜筠表示一次跟劉嘉玲吃飯，嘉玲向她說雖然拍拖多年但仍很愛偉仔，對此嘉玲說：「我份人雖然貪新鮮，但愛情唔會三分鐘熱度，感情係要經營，初初識嘅時候會互相吸引，每一分鐘都想黐埋一齊，所謂淡咗只係開始有番自己，做吓自己有興趣嘅嘢，當初佢肯陪你打四圈，但𠵱家都費事理你！」嘉玲笑說：「𠵱家我哋畀好多空間大家，我哋咁多年已經了解到唔講嘢都知對方諗乜。
「緋聞嘅嘢我哋根本唔會攞嚟講，就算嗌交，都唔會為咗緋聞咁無聊，如果個心唔喺度，根本唔需要解釋。我從來唔會去check男友去咗邊，其實𠵱家呢個階段我哋都好少嗌交，但係我又唔覺得悶喎！相愛嘅話結唔結婚都冇所謂，除非想要下一代，但我哋暫時冇需要。」