地產版記者每日都要不斷打電話攞料，而地產代理應付傳媒查詢，工作壓力大，兼可能「掛一漏萬」，美聯噚日就向傳媒派送傳呼機，第一時間向傳媒發放市場最新訊息，包括市場資訊、特別成交個案、新聞稿資料、特別新聞同公司動態。
呢部傳呼機每間報館一部，月費就由美聯畀。
呢部機同美聯經紀用緊嗰部有啲分別，就係美聯內部嘅機密訊息就唔會響呢部機顯示出嚟。
至於中原，就用公司流動短訊向傳媒發放第一手資料，傳媒就響手機度接收。另利嘉閣設立「地產資訊熱線部門」，計劃聘請2名員工，專責向報館提供公司認為有價值嘅訊息，實行重質不重量。看來地產代理行嘅資訊戰有白熱化嘅迹象。
新盤主導市場，經紀為咗爭生意，不免會發生衝撞，有時甚至搞到上差館，鴻運老闆田國強近排買咗部數碼攝錄機，剛好可放入口袋，阿田話部機咁細隨時可以攞出來影相，帶着佢去睇盤，一有衝突事件就影低佢，到時就唔使口同鼻拗。蘭西諗，部機會唔會真喺能夠令到天下太平呢？
蘭西