華潤集團總經理寧高寧近年頻撲於中港之間，昨日終於兌現起碼同八方講咗兩年嘅飯局。席間八方問到𠵱家嘅中資公司老闆，收到董事酬金（寧總係上市的華潤創業主席，有份收酬金）後是否還要退回國家？坦白的寧總說，華創兩年前與外經貿部脫鈎時已改變機制，只有他自己仍歸北京管，其他人都係由佢管，中央不再過問，而且連所有董事嘅酬金也不用上繳，其中包括佢自己嘅酬金都可以袋袋平安。
翻查該公司去年年報，酬金最高者達七百萬至七百五十萬元，呢位應是寧總，都咪話唔和味。寧總重話，部份紅籌公司如中移動、招商局等都已經改咗制，其他紅籌公司亦會逐步改變。
另外，寧總重以親身經歷介紹咗個戒煙辦法畀大家參考。話說佢年幾前同友人去西北考察，六日旅程分兩部車坐，吸煙者一部，非吸煙者一部，寧總當時重係煙民，就上咗吸煙嗰部車，豈料車上煙民皆是重量級，有人上車時就手持三包煙，而且一直煙接煙不停，車內空氣可想而知，回來之後，寧高寧就不再想吸煙了。
E-mail：