昨日勞醫生帶埋一份包住紅色心心彩紙嘅禮物入立法會，惹來記者猜疑，會唔會係邊位女性朋友或病人家屬送呢？點知話口未完，勞醫生已經搶住話：「我又唔係水泡！」八方先醒起早前梁智鴻同一位妙齡女郎深夜挽手同行，梁醫生事後話自己只係「安慰病人家屬」，女方亦只係當佢係水泡咁攬住。勞醫生咁寸梁智鴻，唔怕同行反面？
講番份禮物，係HKAPI（香港科研製藥聯會）送，勞醫生去完演講嘅紀念品。原來除咗勞醫生自己嘅功能組別選民外，佢亦堅持接觸其他界別的市民，所以連直選議員先會掛嘅街板，佢都做埋一份，擺到明同直選議員爭生意。不過，由於布做嘅街板寫上「站在國民健康與公共衞生的最前線」，好多街坊見到，都來找勞醫生睇傷風感冒同疑難雜症。不過，勞醫生又點可以一邊做政治宣傳，一邊做醫療諮詢？就算令街坊失望，勞醫生都只有做一次拒絕睇症嘅醫生。
E-mail：