祖高爾喺兩個月前先至係英格蘭嘅邊緣球員，但係喺今屆世界盃，分分鐘做咗艾歷臣嘅秘密武器。
今年只得二十歲嘅祖高爾，早排喺英格蘭嘅友賽表現毀譽參半；雖然佢最後都俾艾歷臣選咗去日韓踢世界盃，之但係就冇人認為佢有正選打，覺得佢係後備居多。
不過，謝拉特因鼠蹊受傷肯定缺陣，而受膝傷困擾嘅戴亞又未知打唔打到，唔單止令剛續約利物浦五年嘅後補梅菲有份打，重搞到祖高爾無端端上咗位。
其實，有睇開英超聯嘅朋友都應該知道，祖高爾呢個小朋友波底幾好，傳得又扭得，亦都係咁嘅原因，英國傳媒先封佢做成「新加斯居尼」。
記得加斯居尼喺九○年嗰屆世界盃係着「19號」衫，重一戰成名㖭。唔知喺今屆世界盃又係着「19號」波衫嘅祖高爾，會唔會好似加斯居尼咁威水呢？
今屆幫阿仙奴攞走超聯同足總盃雙料冠軍嘅法國前鋒亨利，唔單止好波，重好識得講說話。話說佢早排公開大讚英格蘭，重話如果法國喺今屆世界盃衞冕失敗，就希望英格蘭可以成為冠軍。佢咁識得𠱁啲英格蘭球迷，真係抵佢都咁受啲阿仙奴球迷歡迎。
早排喺友賽摸和阿根廷嘅威爾斯，前晚喺友賽又畀球迷意外驚喜，主場以一比○贏咗德國。不過，我求大俠就覺得佢哋喺友賽幾叻都冇用，事關佢哋一打親啲具競賽意義嘅比賽，就踢到走晒樣。若然佢哋喺世界盃外圍賽有咁嘅表現，我諗先至值得威爾斯球迷高興。
巴拉圭神奇門將捷拉華日前又發表偉論，大彈決賽周同組對手西班牙實力有限，如果唔係外圍賽對住列支敦士登同埋以色列呢啲弱隊，根本無資格踢決賽周。明眼人都知捷拉華係出口術希望挫西班牙球員士氣。佢都算為國家鞠躬盡瘁，用心良苦囉，不過因住反而激起西班牙球員鬥心喎！
湖人呢支角逐三連冠嘅球隊可以話有驚無險咁入咗西岸決賽，季後賽至今八場波只係輸過一場，都算幾威㗎啦，不過佢哋嘅賭波盤路就真係唔見得人，贏盤只係試過一次咁多，如果有賭兩手嘅湖人捧場客真係唔知好嬲抑或好笑，波就幾乎贏晒，但錢就輸多贏少！
E-mail:
求驗客手記逢星期一至五刊出