最近外國方面有消息傳出，話雷諾車廠正有意為旗下嘅Scenic，推出全新版本，同時亦會推出長陣七座位版嘅GrandScenic，以抗衡近期在歐洲市場熱賣嘅歐寶Zafira，同埋本田Stream等車款。
從電腦模擬出嚟嘅相片中可以睇到，新版雷諾Scenic嘅造型，與同廠嘅VelSatis及Avantime相類似，尤其係車頭鬼面罩及車尾線條設計，就最能夠將呢個特點展露出來。至於車廂布局方面，則由於新車仍在設計階段，故未有關於呢方面嘅詳細資料，但一般相信新車嘅車廂配搭，將會與現有車款相近，同樣以實用為主，而車廂空間重好寬敞實用㖭。然而，廠方亦預算會為新車提供多個引擎配搭，當中包括有1.6、1.8及2.0公升型號，馬力輸出數值各有不同，以迎合不同用家嘅需要。
新車快者可望於2003年底面世，有興趣嘅車迷不妨拭目以待喇。