昨日經紀黃同小初傾開，講到意科控股（943）供股，覺得香港公司監管制度可能真係太寬鬆。意科2000年底20合1，然後1供19嘅壯舉，相信唔少人重記得。公司供股集資所得，就全部用作收購互聯網業務，跟住因為科網股爆煲，全部撇晒帳，令到舊年全年業績勁蝕12億元，問你服未？
此外，公司連同發行可換股票據，搞到欠債增加到2億銀，所以今次又2供1，集資最多7600萬元，主要用作還債。
如果小初係意科嘅小股東，相信亦會學證監會主席所言，將啲股份掟晒出街洩憤，所以唔怪得隻股噚日復牌後，股價大跌12%，收12.5仙。
經紀黃又話，隻股幕後人自舊年開始已經同個大莊唔多妥，當大莊一次過將成批貨沽咗畀人後，隻股已經冇人睇，之後股價不斷下挫，聽聞同嗰手貨有關，所以意科今次供股，目的一來係錢，二來可能係想攤薄嗰批貨。
慕容小初