29吋至32吋的電視機畫面，由於適合大部份香港家庭使用，所以銷量一直唔錯。之不過傳統顯像管（CRT）電視機的機身始終太厚，Plasma薄得嚟畫面又唔夠靚，而LCD雖然又靚又薄，但一直只有20吋嘅畫面，確係細得可憐，令用家難以取捨。幸好全球首部30吋LCD將會喺月尾正式登陸香港，並現身喺一間以專賣LCD、Plasma同投影機嘅全新AVCentre內，畀你任試任玩！
記者：張穎倫 攝影：林栢鈞、陳智良
LG
一見到呢部全球首部嘅30吋LCD機就令小記眼前一亮，因為佢整個外殼都以鋁合金製造，比一般電視機或者Plasma只用膠殼，確係高貴同硬淨好多。機身厚度只有103mm，夠晒纖巧，無論放上櫃面定掛牆都夠晒慳位。講到功能，雖然冇內置電視接收器，但就有雙畫面設計，可以將畫面一分為二，同時睇DVD同錄影帶都得。再加上畫面亮度高達450cd/m2，再配合ProgressiveScan順序掃描，畫面夠Sharp之餘，細緻度更贏Plasma成條街，非常厲害。另外佢亦可對應數碼廣播，就算遲啲香港啟播亦唔使換機。
型號：MW-30LZ10
體積：W759×H501×D103mm（淨機身）
畫面比例：16:9
售價：約$40,000（第一電業）
＊約5月尾發售
LG
鍾情40吋嘅Plasma用家，有冇留意香港大部份嘅Plasma都係採用16:9嘅畫面比例，睇電視節目就會好怪。所以呢部新到嘅Plasma，就採用4:3嘅畫面比例，再配合專用電視接收器，睇電視節目絕對啱啱好。畫面可顯示色階達到1,677萬色彩，喺Plasma當中亦算數一數二，而且一次過包埋電視接收器、喇叭、掛牆架或座枱架，唔使逐件配。
型號：MT-40PA10
體積：W930×H711×D78mm（淨機身）
畫面比例：4:3
售價：約$47,000（第一電業）
多功能接收器
隨機附送嘅電視接收器，唔單止令到電視接收畫面更靚，而且又可以接駁錄影機、DVD以至個人電腦，更有DolbyVirtual音效同Nicam解碼，功能齊備。
FUJITSU
身為全球Plasma兩大巨頭之一嘅FUJITSU，眼見對手NEC之前推出嘅61吋最大Plasma有咁大迴響，當然不甘示弱。最新推出嘅PDS6101型號，同樣擁有61吋超巨大畫面，而且更加入獨有嘅AVM處理器，令畫面不論喺靜止抑或播放時嘅光度都更靚，解像度仍可保持喺1365×768像素，一啲都唔輸蝕。
型號：PDS6101
體積：W1452×H862×D119mm（淨機身）
畫面比例：16:9
售價：$148,000（第一電業）
新出顯像管電視
東芝
東芝將於月底推出的36吋16:9闊螢幕，以更靚畫面再戰江湖。畫面方面加入咗東芝最煞食嘅100Hz功能，畫面極之穩定，質素冇因畫面拉大而變差。再加上有齊DolbyDigital、DolbyPro-Logic同DSP音效，以及附送嘅前置喇叭，音響更係超班。包埋大大個電視架，高檔得嚟售價反而唔貴夠抵玩。
型號：36ZP18
體積：W855×H622.3×D594mm（淨機身）
畫面比例：16:9
售價：約$20,000（各大電器行）
＊約5月尾有售
Panasonic
喺中價29吋電視機嘅市場入面，Panasonic嘅銷量一直都唔錯。事關佢同自己嘅高級型號一樣都係採用平面輝聚顯像管，能夠將畫面嘅彎曲變形完全消除，像真度更高。而呢部新機更採用前置雙喇叭設計，音色比舊款明顯更有層次感，國際線路同Nicam當然會有齊。
型號：TC-29P42G（水貨）
體積：W658×H591×D517mm
畫面比例：4:3
售價：$4,980（華仁會）
聲寶
之前嘅29吋型號，憑住近似iMac嘅外形賣個滿堂紅。今次乘勢推出21吋型號，將開關掣改為反晒光嘅銀色，Cyber味更加重。另外除咗機前機後各有一組輸入外，更再加輸出一組，機仔中確係少見。功能上亦有環繞聲同國際線路，一般用家最啱用。
型號：21C-FX8
體積：W621×H468×D474mm
畫面比例：4:3
售價：$2,380（華仁會）
PHILIPS
相信你都有試過睇碟嘅時候，對住啲16:9影碟，但電視卻係4:3嘅時候，畫面上下就會冇咗一大截好冇癮。所以呢部機主打擴展4:3功能，能有效將畫面拉大，令用家睇得舒服。而且21吋機仔細細，都一樣係純平畫面，又有國際線路同色差輸入夠晒齊全。
型號：21PT2302/57R
體積：W610×H460×D510mm
畫面比例：4:3
售價：$2,380（華仁會）
店舖資料
第一電業有限公司AVCentre（查詢：25297778）
香港皇后大道東43-59號東美中心8樓808室
華仁會（23980280）
旺角花園街75-77號花園商業大廈5、6樓
東芝（查詢：29560222）
想睇齊LG同FUJITSU所出嘅影音產品，就一定要去新開嘅第一電業有限公司AVCentre走一轉。面積有1,700呎，將LG同FUJITSU分為兩大展區，入面有齊各種新型號，唔同尺寸嘅LCD同Plasma畀你任試，而且除咗播放DVD外，更罕有地連接電視廣播，畀你即場睇到呢批新機嘅不同表現。另外更有試映室，有齊隔音設備，等你坐低慢慢試清楚佢哋嘅投影機、LCD同Plasma，睇啱更可以即場選購，夠晒方便。
試映室入面有齊大銀幕同梳化，等你慢慢試齊各款投影機，而銀幕後更裝有Plasma，可以畀你選擇。值得一讚係呢度採用嘅音響系統都算唔錯，而且隔音做得好好，儼如一個迷你戲院。