荔枝上市，紅毛丹亦隨住登場，泰國、馬來西亞同印尼均有出產，今年嘅紅毛丹亦比去年略平。我鍾意食紅毛丹，因為果肉酸中帶甜，另外重含豐富維他命C，好有益處，佢唯一缺點係汁少咗啲，但肉夠厚。食紅毛丹不可不知，食嘅時候由頂部開始食起，否則肉同核好易黐埋一齊。紅毛丹以色澤鮮紅，皮上短毛青BB及顆粒均勻大個就係靚貨。
$10/磅 各大果檔有售
五月係合掌瓜盛產期，我就至鍾意用佢煲湯，加片薑、瘦肉、魷魚一齊煲湯，啖湯都不知幾鮮甜，燥熱飲佢更有清熱下火功效。將佢切片炒又得，可以清炒或配豬肉、豆豉炒。買合掌瓜千祈咪貪大個，以我嘅經驗，愈細Size嘅合掌瓜啲筋愈少，皮青嫩兼光滑嘅則更佳。
$4.8/斤 各大菜檔有售
文：肥師奶