馮仁昭四圍超:<br>少年包公唔怕得罪無線

馮仁昭四圍超:
少年包公唔怕得罪無線

亞視劇集《壯志雄心》嘅內地演員陸毅前晚去咗錄影遊戲節目《群雄奪寶》。陸毅除咗有份演《壯志雄心》外,亦係無綫《少年包青天》嘅包青天,佢早前因為要喺內地趕拍劇,所以冇時間幫無綫宣傳,但今次就抽到時間幫亞視宣傳,佢話:「我當時正在拍《花樣的年華》,製作公司特地幫我請假都請不到,我也沒辦法。」

谷祖琳生日照開工
谷祖琳噚日接受港台《娛樂滿天星》訪問,佢表示今日就係佢生日,重話之前已經同啲fans慶祝咗,收咗好多fans親手做嘅禮物,好感動。谷祖琳雖然今晚正日生日都要做嘢,但係夜晚會同屋企人食餐飯,佢話:「同屋企人食完飯之後,約咗啲朋友一齊去卡拉OK慶祝。」

任賢齊獲老細贈食燕窩
任賢齊(小齊)一連三場演唱會今晚正式開鑼,噚日佢喺紅館積極為個唱綵排,小齊今次係第三次喺香港開個唱。小齊話:「老闆(林建岳)𠵱家日日都叫人送燕窩畀我食,呢世人都未食過咁多燕窩,佢話驚我要減肥唔夠營養,我呢幾日都唔敢食雪茄。」

郭秀雲被馬「濕吻」
郭秀雲噚日喺上水雙魚河騎術學校出席「馬房日記名人版II」嘅活動,見佢同啲馬玩得不知幾咁開心,畀隻馬又錫頸、又錫胸,搞到佢成件衫都係口水,郭秀雲重話都係第一次同馬「frenchkiss」,不過就冇kiss個嘴。郭秀雲果然係對動物充滿愛心。

莫文蔚密謀咀小齊
莫文蔚(Karen)噚日喺新城接受《聯Fan所》訪問,Karen話好希望同老友任賢齊合作拍電影,重話做乜嘢角色都得,就算拍親熱戲都會好好笑。而Karen最新專輯喺台灣銷量亦相當理想,佢話唱片公司送咗個水晶球畀佢作獎勵,重寓意佢係公司嘅掌上明珠呢。

焦媛想獨佔戲服婚紗
焦媛噚日喺西灣河文娛中心為今日演出嘅《阮玲玉》舞台劇進行總綵排,佢噚日着上婚紗戲服排練,由於今次舞台劇反應非常好,所以已經吸引咗澳門同珠江三角洲兩地邀請作巡迴演出。而焦媛就自爆話想將戲服據為己有,佢話:「我覺得好有紀念價值,不過件婚紗我唔會留番結婚時着,因為唔係咁好意頭。」

沈傲君為工作剪青絲
嘉禾新人沈傲君有份拍嘅電視劇《壯志雄心》於下星期三喺亞視首播,佢話:「本來我把長頭髮去到腰㗎,為咗拍劇剪到𠵱家咁短頭髮,我都好心痛,重差啲喊㖭。」沈傲君喺哈爾濱出世,於上海長大,不過佢啲廣東話都唔錯,佢話:「我拍啲電視劇都係香港導演,為咗溝通好啲,咪畀心機學囉。」