母親節熱潮一年熱過一年，今年雖然仍係經濟低潮期，經濟不景，但大酒樓、會所一樣做到手忙腳亂，生意好到不得了。上星期五晚，有親戚召集食晚飯，諗咗一大輪，遷就喺鰂魚涌區工作嘅人，走咗去華蘭路嘅「東海」，以為一定夠清靜，一定有枱。點知上到去，人山人海，爆到瀉，如果唔係親戚有交情，預早打定電話，我哋一定敗興而返。
問經理：「點解咁好景？」經理話：「母親節吖嘛，好多人要同外家食飯，再同自己阿媽慶祝母親節，所以星期五、六、日都爆滿。」東海又係識做生意嘅，二千一百八十元食一圍，有龍蝦、有雞絲翅、有清蒸東星斑、帶子、乳豬、大壽包……真係抵到爛，何況價錢雖減，質料一樣維持水準呢！
到咗星期日，去沙田馬會凱旋廳飲茶，竟要分開三輪，十點半到十二點、十二點到一點半、一點半到三點，又係人頭湧湧，夥計做到氣咳，左丁山與家人排隊等位之際，見到一位中年阿媽畀利是一位老年阿婆，阿婆笑笑口收咗，對中年女人講：「最好日日都係母親節！」阿婆都幾幽默，不過如果日日都係母親節，啲仔女就冇咁好心機帶母親上酒樓咯。母親節已經變成一個商業項目，酒樓要做生意，報紙亦都大sell溫情，當母親節係一個大商機。做生意也好，應景也好，大家唔好只係一年一度孝順阿媽呀。