港股噚日一度急升逾200點，若非標普500期指午後大跌，港股可能已經突破12000關口，將期指淡友殺到一頸血。黑客話，其實外圍冇咩特別壞消息，都唔知係咪班淡友刻意壓低成交薄弱嘅標普期指嚇人。
中移動（941）如果發得成80億元人民幣債券，配股集資壓力就相對減少，早前入貨嘅大戶可能借此進一步挾高中移動。大家唔好忘記，高盛早前無端端叫人投機性買入中移動。
和記港陸（715）早前升至1元水平後，聯席主席陸宗霖曾減持1.3億股，套現逾1億元。此股由年初至今升幅已接近１倍，雖則話有和黃（013）概念及可能獲得和黃注資，但仍未有任何計劃落實，股價暫時幾難進一步突破。噚日僅微升0.5％，收0.98元，但成交仍然活躍，有1.56億元，確係一個大手減持嘅良機。
近期燃氣股炒風大作，但實際上質素良莠不齊，而且市值多屬中型股，如要大力發展則肯定要在市場大舉抽水，一旦游資流走，則下跌風險極大，因此已有資金開始追捧股價落後兼優質嘅中煤（003），但噚日Cookie話聽到有基金減持中煤，喺10.90元高位出現大戶對撼現象，大家要留意。
創維數碼（751）噚日突然急升23.4％，收0.79元，成交達8039萬元。ｉ師傅話，聽講又有大戶想配售舊股，股價因而被推高。
阿 虎