政界桃色風暴愈吹愈烈，從阿松忘年戀到梁智鴻安慰病人女家屬，寶哥哥花都甩鞋無話可說，最近就連一向低調嘅林煥光同女性朋友飲咖啡都難逃一劫。噚日嘅立法會氣氛古怪，男議員見到女記者，都大叫要保持三呎距離先敢講嘢。惟獨係霍震霆夠鎮定，被一大班女記者圍住，都面不改容侃侃而談。
畢竟佢娶咗位最美麗港姐朱玲玲，美滿姻緣成日有傳聞。唔通喺人人自危嘅情況下，小霍都唔擔心自己會捲入呢場風暴？「我呢啲金漆招牌唔驚嘅！」咁又係，小霍成日掛住搞體育，做埋一大堆康體職務，曾被佢老竇霍英東話佢「正經事唔做」。又難怪，小霍無非都係想同老婆講，自己重邊有時間搞三搞四啫，睇怕都值得立法會同寅，夾錢送番個「小霍愛玲玲」嘅金漆招牌畀佢。
不過，講到邊個會陪佢去南韓睇世界盃，為中國隊打氣，小霍卻突然神情忸怩，死都唔肯講。睇嚟每個人始終都會有啲秘密在心中，咁世界盃心水隊伍講得嘞啩？小霍例牌又話中國隊。實際啲啦，𠵱家講緊邊隊有捧盃相喎，小霍初時話巴西，但佢諗諗吓，又改口話要揀番法國同阿根廷，葡萄牙都算係黑馬咁話。好彩只係揀球隊，如果對住位靚老婆，小霍都係咁三心兩意，大家實唔放過佢。
（圖）霍震霆娶到最美麗港姐朱玲玲做太太，又點會擔心捲入緋聞風暴呢？
E-mail：