美股經過連續兩日勁升後，技術走勢明顯改善，杜指前晚升穿50日線（現處10261），其他短線指標亦全面向好，杜指近期低位9800有望完成尋底。不過，美股走勢實在太波動，趙飛雲暫時都唔敢講美股轉強可帶動港股升破萬二關。
可能近排見得太多美股升港股跌嘅走勢，早市稍為猶豫，已錯失低吸長實Call輪9043嘅機會。趙飛雲覺得高追值博率唔係太大，一旦回頭會坐艇，所以決定唔做嘢，但收市後睇到高盛份報告就覺得有啲後悔。高盛話長實（001）分拆長江生命科技上市，可帶來20至30億元特殊利潤，長實每股資產淨值增加2%或1.52元。
不過，長實近期高位阻力77元，支持位74元，未升破77元之前，仍係大概3元左右嘅上落幅度，揸咗現貨或者9043者當然望佢破關而上，但未買貨則不妨再觀望，待確認升破77元才考慮追入，或等候回頭至74元附近低吸。
早幾個月炒過一轉嘅上海實業（363），5月份走勢較波動，但技術回復強勢。據聞屬下光明乳業申請A股上市已獲通過，或有短炒機會，可伺機追入短炒一轉，但跌破16.15元則宜先計數。
趙飛雲