向海嵐噚日喺電視城為無綫新劇《帝女花》試造型，飾演陳圓圓嘅向海嵐着住肚兜裝，非常性感，遲啲會有場戲講佢喺菩薩面前跳豔舞。
問向海嵐喺現實會唔會咁做，佢話：「我諗唔同地方有唔同風俗習慣，我就冇宗教信仰。其實求神冇用，應該信自己多啲。」
吳啟華噚日喺無綫電視城為新劇《黑夜彩虹》試造型，佢話：「我喺套劇度係演一個由爛仔變成有錢仔嘅角色，因為劇情需要，我會染髮。」佢重話好擔心人到中年會有脫髮情況出現，佢話：「我好擔心好似歐陽震華同陶大宇咁，𠵱家我都搵緊方法去防止禿頭。」
朴志胤冇耐前先喺漢城遇上車禍，而周日（十二日）佢喺台灣演唱後返後台嗰陣，又唔小心跌親傷咗頸部，返韓國後即刻要打石膏喺屋企休息，所有活動都要暫停。最慘係佢二十五號喺漢城有場好大型嘅演唱會，唱片公司𠵱家要賠錢畀買咗飛嘅人。
李克勤自無綫播出《法網伊人》之後，人氣急升，演唱會賣座，無綫又搵佢唱世界盃主題曲《Victory》，最近呢首歌嘅原作曲者、女子組合Bond又話要同克勤拍個特別版MV，之後重有電影公司想搵克勤唱《小馬王》主題曲，於是唔少廣告商乘勢搵佢拍廣告，如果接晒嘅話，收益應該唔錯。
李惠敏噚日去有線接受毛舜筠嘅《娛樂熱賣四方城》節目錄影訪問，因為呢集係最後一集錄影，李惠敏都算係壓軸嘉賓。佢兩個女人同埋鄺偉明、鄒凱光兩位主持一邊打牌一邊傾偈，李惠敏話佢平時好少打牌，打親都輸，係水魚一名。而毛舜筠就話自己平時冇乜打牌。