陳啟泰（阿Ken）、萬綺雯、彭子晴同江美儀等人，前日喺屯門龍鼓灘拍攝亞視劇集《吉祥任務》。嗰日又曬又熱，佢哋個個都拍到大汗叠細汗，趁未埋位時就四圍搵地方避開猛烈嘅陽光。
而當日最慘嗰個係阿Ken，佢除咗拍到身水身汗之外，重因為劇情講及佢要扮死去嘅阿爸，條屍喺地下水箱被發現，於是要拍一場落水戲。
阿Ken拍呢場戲時，一早做好準備，預先着定單車褲打底，換好衫後，走落一個兩呎乘兩呎闊、深約三呎嘅水池扮死屍。現場所見，個水池啲水好污糟，既有泥沙，又有木糠，不過阿Ken毫無怨言，拍完重唔使沖涼，阿Ken話：「涼浸浸都唔知幾舒服！」阿Ken呢種敬業樂業嘅精神，真係值得大家學習。