港股繼續與外圍脫鈎，早段略受帶動而開高，但之後行情又反覆走軟，結果下跌43點收場，成交82億元。
噚日藍籌股乏善足陳，市場焦點落在股仔身上，一時之間禾雀亂飛，特別係仙股，在莊家和有關人等推波助瀾下，升勢凌厲，最令人側目者係遠生醫藥（140），早市重成緊1.3仙，突然間有大盤掩至，掃到上2仙水平，停一停又再掃過，結果以3.3仙高價收市，大升153%，成交15.3億股，直情賓虛咁嘅場面，聽聞又係俾大陸資金睇中，呢類仙股，堆一億幾千萬埋去，必然炒到飛起。
大陸資金暫時唔玩國企，轉行捧有實力同有概念嘅二三線股，光通信（603）狂升幾倍已膾炙人口，噚日略為回一回氣，輪到益來國際（370）同金威集團（910）接力而上，前者收15.6仙，升13%；後者收47.5仙，升10%。大陸資金另一隻愛股生命科技（1180）午後停牌搞「披成」，復牌後都有得諗。講番隻金威，聽聞月底有大騷，場面會好墟冚，屆時股價好大機會係坐五望六。
另一隻有大陸資金上咗車嘅永義國際（1218），近期股價亦有強勢表現，連升3日，由9仙升到12.2仙，升幅雖然成35%，但相比其他以倍計的，永義現階段可說仍在熱身。
永義早前1供1，每供8仙，現價已比供股價上升達5成，供股後，永義發行22億股，市值不過2.7億元，資產淨值4.5億元，此類細公司最易發圍，大陸資金落叠，必有智珠在握。
永義以經營成衣業務為主，今年收購美國MaryMac時裝品牌，剛好配合美國經濟復甦，銷路穩步上升，永義已計劃將MaryMac進軍大中華區，主力打開中國市場，相信日後會成為永義盈利的主要來源。
永義升勢再起，現水平吸入，初步上望250日線15.6仙，中線以去年11月的20仙為目標，止蝕位10.5仙。 郭兆誠