剛剛同曼聯續約成為全球最高身價球員嘅碧咸，雖然重養緊傷備戰世界盃，觀眾暫時無緣見到佢踢波，但八方收到料，碧咸同一班世界級球星幫adidas拍咗個世界盃最新廣告，明日就會出街同大家見面。
廣告公司老友對八方講，呢個新廣告係描述一班「足球癲狂症」研究所人員，怎樣用科學方法去解釋世界盃熱潮現象誕生，被研究所觀察嘅對象粒粒都係世界頂級巨星，包括英國嘅碧咸、法國嘅施丹同巴夫斯、意大利嘅狄比阿路、西班牙嘅魯爾、葡萄牙嘅雷哥斯達、德國嘅佳拿，甚至意大利籍嘅國際級球證哥連拿。
喺廣告片內，呢班球員成日掛住踢波，瞓覺時掟個波畀佢哋，佢哋都會做出條件反射嘅踢波動作；佢哋玩智力遊戲，只係識得將圓球放入正方形入口嘅箱，因為覺得好似射入龍門；而球證就不斷出黃牌，好搞笑。
整輯廣告用咗幾多錢？老友話係商業秘密，只肯話廣告片係由荷蘭知名的「180Communication」創作，重特登成隊crew飛去英國牛津UpperHeyFord拍咗成十日，加埋請班球星嘅演出費，諗吓都知一定唔少嘢。
E-mail：