和記港陸（715）同光通信（603）近排熱炒，令到一眾股仔炒風熾熱，不但炒家開心，公司亦能受惠，皆因成交同股價靚，要集資亦唔難。
好似天鷹電腦（1129）就係其中一個例子，隻股今年1月17日上市，重有個半月就剛剛夠半年。經紀陳話，天鷹上市時以每股50仙發行新股，集資淨額只得3800萬元，其實唔多夠使，據講公司一早計劃好，希望上市半年後，可在80仙水平配股集資。
據講天鷹由上市到𠵱家，一直由一幫台資炒家睇住，早期曾經受莊家股爆煲事件拖累，股價一度急挫，但好快趣抽番上去。天鷹近月來股價企穩60仙水平，反映貨源相當歸邊，經紀陳話現階段可以靜侯佢突破。
另外，獲北京中信提供10億元貸款嘅東南亞木業（1205），自從5合1併股後，股價一直喺1元企得好穩，但近排則轉弱，尤其噚日更一度跌至96仙。經紀陳話，聽聞原本夥拍中信投資森林一事有阻滯，所以股價先至變成咁。 慕容小初