咪以為身光頸靚的銅鑼灣白領，只專情西餐日菜，其實他們也有豪爽奔放的一面，每晚六點準時轉入寶靈頓道，就能欣賞到大家品嘗鑊氣十足的港式海鮮小菜，時令材料百搭，兼且常有驚喜，碟頭大新鮮熱辣，唔怪得閒日周日都座無虛席。
記者：楊一凡 攝影：伍慶泉
吊筒長至四吋時，味道至鮮肉地夠爽，只要煮時夠眼明手快，無論用秘製豉油煮、蒜茸蒸或椒鹽，都咁好味，當中以豉油皇至受歡迎，店方為保持招牌菜水準，對品質檢定非常嚴格，曾試過因來貨唔靚，停止供應，但咁耐試過幾次而已。
何家試味：成隻吊筒，身首相連，並非甩頭甩骨，一睇就知新鮮，不過佢啲豉油應該係加咗啲嘢，所以食落零舍鮮甜。
紅燒乳鴿$38隻（下）
在街頭巷尾都高舉「十蚊乳鴿」的時候，$38隻紅燒乳鴿點解會供不應求呢？關鍵一咬即知，店方選用新鮮乳鴿，肉汁多連帶鴿味香濃，而坊間的平鴿大都選用雪藏貨，頂多皮脆但肉味當然不及鮮鴿香；晚晚賣個鍋底朝天的泥鯭粥是用拆肉的魚骨熬湯再煲粥，鮮味貫徹始終。
梁先生試味：紅燒乳鴿帶有好香的滷水味，用滾油淋熟，皮薄脆肉鮮嫩；泥鯭粥魚味濃，十點之後嚟，實賣晒。
腩仔並不是想像中的肉騰騰，淡茂茂，師傅老早做咗手腳，先用調味料醃足一晚，翌日薄切酥炸，炸出個入口香脆，然後便可跟走過油的藕片以及濃濃南乳醬，同炒同拋，眼見塊塊都沾了南乳醬，係時候上碟。
Claudia試味：腩仔好香脆，夾埋爽口多汁的蓮藕同吃，不覺油膩，送埋酒重正！
泰式炸墨魚餅$42（下）
食店開業多年一直以海鮮打響招牌，所以瀨尿蝦煮來駕輕就熟，用金銀蒜加指天椒及自製辣椒醬同炒，未送到埋枱，已香遍全店，必試！外表平凡的「臂」製墨魚餅，要求廚師們在十分鐘內把墨魚、蝦肉及豬肉混合打起膠，少啲臂力都唔掂。
May試味：墨魚餅好爽甜，炸得乾身，咬開仍有肉汁；瀨尿蝦好香辣，幾十蚊一大碟，蒜茸惹味到呢，好想撈飯食晒落肚。
成個煲至緊要係個瑤柱汁，因為西蘭花、金菇和鮮竹隨意拖水後，墊在煲底，埋位等索瑤柱汁；廚師把浸軟的瑤柱連汁，齊落鑊，加些少蠔油及調味，兜兩兜，大牌檔講求快手快腳，但快得嚟，切忌重手，好彩經驗豐的大廚每次都讓鮮味瑤柱險勝鹹香蠔油。
王家試味：沾滿金菇瑤柱汁的鮮腐竹和西蘭花，雖然是素菜但炒得十分惹味，好啱送飯。
店名：森記海鮮火鍋飯店
電話：28388998
地址：灣仔寶靈頓道16號BG26號（銅鑼灣地鐵A出口）
座位：約100個
營業時間：上午11時至下午2時半，晚上6時至凌晨1時。
付款方法：只收現金