美股大上大落，港股無動於衷。港股近日走勢基本同美股相反，好似前晚美股大反彈，恒指噚日又係先高後低，跌43點收市，收11690。
恒指噚日跌穿10日線（現處11715）收市，而20日線（現於11477）正以每日約50點速度攀升，如果呢幾日市勢牛牛皮皮，則恒指星期五會接觸到20日線。按過往經驗，恒指第一次掂到20日線多數有反彈，甚至再展新升浪。因此趙飛雲仍維持在11600附近博反彈嘅部署，當然亦須視乎當時嘅市勢而定。
長實（001）及和黃（013）近期認真活躍，俾佢哋睇起嘅二三線股，多數大炒特炒，但長實及和黃股價則仍處唞氣階段，噚日除息，長實微跌3仙，收74.25元。趙飛雲會睇多長實一兩日，如果74元（即20日線支持）守得住，會按原定計劃先買1注長實Call輪9043。
和黃走勢較差，噚日跌穿20日線69元，如果連50日線68元亦失守，則今次升勢將破壞。如果港股升勢未完，和黃不應跌穿68元，和黃走勢對後市應有一定啟示。短期大市火車頭估計仍是滙豐（005），繼高盛之後，不少華資行亦調高滙豐目標價，港股若破萬二，滙豐可見100元。 趙飛雲